Gidakop sa kapulisan sa Brazil ang usa ka content creator human mapamatud-an nga imbento ra matud pa niini ang iyang kaugalingong kidnapping uban ang tabang sa pipila ka armadong lalaki.
Kahinumdumang niadtong Abril 21, 2025, gi-post ni Monniky Fraga sa iyang mga followers ang giingong hadlok nga kasinatian diin kini ug ang iyang bana nga si Lucas giatangan sa tulo ka armadong lalaki duol sa ilang balay, gidala sa lasang, ug ug gihulga nga patyon kung dili mobayad og ransom.
Sumala ni Fraga, gibuhian ra sila human nakahatag og kwarta ang ilang pamilya. Human sa insidente, midiretso sa kapulisan si Lucas aron magreklamo tungod sa grabeng bun-og nga iyang nasinati.
Apan sa lawom nga imbestigasyon sa Special Operations Group (GOE), nabutyag ang kamatuoran. Nadiskobrehan sa phone records nga si Monniky adunay padayon nga komunikasyon sa usa sa mga “kidnapper” sa wala pa ug pagkahuman sa insidente.
Sumala sa kapulisan, kunsabo lamang ang influencer ug mga suspek.
Ang tinuod nga biktima mao lamang ang iyang bana nga si Lucas, nga wala kahibalo sa plano ug mituo nga tinuod nga naa sila sa peligro, ug nabun-og pa sa insidente.
Human sa hapit usa ka tuig, gidakop si Monniky tungod sa mga kaso sa extortion, procedural fraud, ug pagsumite og bakak nga police report.
Sa pagkakaron, anaa na usab sa kustodiya sa mga otoridad ang usa sa iyang mga kauban, diin namatay na ang usa, samtang gipangita pa ang ikatulo.