Tungod sa kahubog ug walay igong rason, kalit lang gidunggab sa usa ka lalaki ang iyang kumpare o kainom didto sa Sitio Rancho, Barangay Bangahan, lungsod sa Pangantucan. Base sa impormasyon sa Pangantucan Municipal Police Station, giila ang biktima nga usa ka 31-anyos nga lalaki, samtang ang suspek mao si alyas “Doydoy” kinsa kalit lang mitungha alas 5:10 sa kaadlawon ug gidunggab ang biktima sa tuo nga bahin sa tiyan gamit ang kutsilyo.
Human sa maong pagpangdunggab, daling misibat sa wala mailhing direksyon ang suspek samtang ang biktima dinalian usab nga gidala sa iyang mga kauban ngadto sa balay tambalanan aron matambalan.
Sa kasamtangan, nagpadayon ang hot pursuit operation sa Pangantucan PNP batok sa miikyás nga suspek. Giandam na usab sa mga otoridad ang haom nga kaso alang sa dugang imbestigasyon ug saktong disposasyon.