Nadawat na sa 769 ka mga public utility jeepney o PUJ drivers sa dakbayan sa Malaybalay ang tag 5 ka libo ka pesos nga cash assistance ubos sa Assistance to Individuals in Crisis Situation o AICS program sa DSWD. Sa pakighinabi sa Bombo Radyo Malaybalay ngadto kay Mohamad Hajam Sarip, ang Chief Transportation Development Officer sa LTFRB Region X, iyang gipahayag nga ang maong distribusyon gituyo alang sa mga drayber sa siyudad human usab narekord ang susamang payout sa Valencia ug Maramag niadtong miaging semana.
Matud ni Sarip, ang mga nakadawat sa ayuda mao ang mga beteranong PUJ drivers diin gikinahanglan lamang nila ang orihinal ug kopya sa ilang driver’s license aron makuha ang maong pinansyal nga tabang.
Gawas sa ayuda, gibutyag usab sa opisyal nga nagpadayon ang apela sa mga transport cooperatives sama sa NOBSCO alang sa planong pag-operate og taxi sa Malaybalay tungod sa paspas nga kalambuan sa dakbayan. Gilauman nga masundan pa ang maong tabang sa higayon nga adunay pinal nga pahibalo gikan sa nasudnong ahensya.