Andam na ang Pinay beauty queen nga si Gazini Ganados alang sa iyang dula sa kauna-unahang Miss Grand International (MGI) All Stars pageant human kini opisyal nga niabot sa Bangkok, Thailand.
Sa iyang unang adlaw sa mga aktibidad sa pageant, daling nakakuha og atensyon si Gazini human siya nagrampa suot ang usa ka “phoenix-inspired” nga bisti nga hinimo sa Filipino designer nga si Patrick Isorena. Gawas niini, misamot pa ka init ang iyang ngalan sa kalibutan sa pageantry human siya nalakip sa Top 5 sa labing unang Hot Picks list sa sikat nga pageant site nga Missosology alang sa maong kompetisyon.
Ang MGI All Stars usa ka bag-ong edisyon sa pageant nga bukas alang sa mga babaye ug trans women nga nag-edad og 20 hangtod 40 anyos nga duna nay kasinatian sa pag-apil sa bisan unsang international pageant kaniadto.