Sayo nga nanamilit ang Pinay tennis star nga si Alex Eala sa Internationaux de Strasbourg didto sa France human siya gipildi sa Ukrainian qualifier nga si Oleksandra Oliynykova sulod sa tulo ka set, 6-3, 5-7, 3-6, sa ilang dula sa unang hugna (first round).
Nindot unta ang sinugdanan sa World No. 38 nga si Eala human niya makuha ang unang set pinaagi sa iyang agresibong mga drive ug dropshot. Apan kalit nga nausab ang dagan sa dula sa ikaduhang set sa dihang miresgistar og 4-0 nga labaw ang Ukrainian tungod sa iyang talagsaon ug makalilibog nga estilo sa pagpalo nga nakaguba sa ritmo sa Pinay.
Bisan pa man og misuway si Eala sa paggukod ug pagbawi sa deciding third set, nanalipod si Oliynykova sa iyang labaw ug nakuha ang sunod-sunod nga puntos human sa hapit tulo ka oras nga kulbahinam nga kombati. Gumikan niini, pahuway una si Eala karong semanaha samtang mangandam alang sa iyang dula sa French Open sunod semana.