Tingkagol sa selda ang usa ka 39-anyos nga lalaki human nadakpan sa gikasang buy-bust operation batok sa ilegal nga droga didto sa Everlasting Village, Barangay Poblacion, lungsod sa Pangantucan. Giila sa Pangantucan Municipal Police Station ang suspek nga si alyas “Polax,” kinsa nakuhaan og duha ka plastic sachet sa gituohang shabu.
Sumala sa kapulisan, motimbang sa 5.08 gramos ang nakumpiskang ilegal nga droga nga adunay standard drug price nga kapin sa 34 ka libo ka pesos. Gawas sa droga, narekober usab sa mga otoridad ang buy-bust money, cellphone, ug usa ka motorsiklo nga gigamit sa suspek.
Sa pagkakaron, giandam na sa kapulisan ang kasong paglapas sa Republic Act 9165 o Comprehensive Dangerous Drugs Act of 2002 batok sa dinakpan. Ang mga ebidensya gipadala na usab sa forensic unit alang sa laboratory examination ug saktong disposisyon.