Gidagsa sa dako nga ihap sa mga residente ang buhatan sa Commission on Elections o COMELEC Malaybalay alang sa katapusang adlaw sa voter’s registration. Sayo pa lamang sa kabuntagon, taas na ang linya sa mga aplikante nga gilangkuban sa mga first-time voters, magpa-reactivate, ug mga magpa-transfer sa ilang voting records alang sa umaabot nga piniliay.
Sa pakighinabi sa Bombo Radyo Malaybalay ngadto kang Atty. Danilo Dividina, ang Election Officer sa COMELEC Malaybalay, gipahayag niini nga gilauman na ang pagdagsa sa mga tawo nunot sa batasan sa uban nga moadto sa deadline.
Usa sa mga nagpila mao ang inahan sa usa ka Person with Disability o PWD nga si Sheryl Olipendo-San Jose. Iyang gipasabot nga tungod sa ka-busy sa adlaw-adlaw nga mga buluhaton ug sa panginahanglan sa hugot nga pag-atiman sa iyang anak, karon lang sila nakahigayon, apan iyang gipaningkamutan nga makaapas aron mahatagan og kahigayonan ang iyang anak nga makat-on sa proseso sa pagbotar.