Miapil na sa Minority bloc ang duha ka independent senators sa wala pa ang pag-convene sa Senado isip impeachment court karong Lunes, Mayo 18.
Lakip niini sila Senator Juan Miguel Zubiri ug Senator JV Ejercito.
Sa wala pa ideklara ni Zubiri ang iyang pag-apil sa minority bloc, gipatin-aw niini nga ang iyang pag-abstain sa miaging botohan sa liderato aron mapadayon ang iyang kagawasan sa pagboto sa mga importanteng isyu alang sa katawhan, apan gusto gihapon niyang mahimong kabahin sa Senate Minority Bloc sa aspeto sa organisasyon.
Samtang, gipasiugda usab ni Senador Ejercito ang iyang independence aron mas epektibo niyang matuman ang iyang katungdanan ug mga programa.
Nagpasalamat usab siya kang Senate President Alan Peter Cayetano sa pagsalig ug paghatag kaniya og oportunidad nga mahimong Majority Leader, usa sa labing gamhanang posisyon sa Senado, apan nagdumili kini aron magpabiling independent.
Sa ulahi, gipili ni Ejercito nga moapil sa Minority bloc human sa pagpangutana ni Cayetano kon magpabilin ba siyang independent o moapil sa minority.
Tungod niini, mikabat na sa 11 ka miyembro ang Minority bloc samtang 13 usab ang naa sa Majority bloc.
Sa pagkakaron, si Senator Vicente Sotto III ang Minority Leader samtang si Senator Joel Villanueva ang nagserbisyo isip acting Majority Leader.