Gipatumba sa Pinoy mixed martial artist nga si Lito Adiwang ang Indonesian wrestler nga si Eko Roni Saputra sulod lang sa 34 segundos sa ilang engkwentro sa ONE Fight Night 43 didto sa Bangkok, Thailand. Wala usiki ni Adiwang ang panahon ug daling nagpauwan og sunod-sunod nga mga kumo ug ground-and-pound sa pagsugod pa lang sa away. Tungod sa kakusog sa mga kombinasyon sa Pinoy star, daling natumba si Saputra ug napugos ang referee sa pagpahunong sa kombati nga wala pa gani kaabot og usa ka minuto.
Bisan pa man nga mitaas ang timbang ni Adiwang ngadto sa 140-pound catchweight alang sa maong dula, wala kini nahimong babag sa iyang kadaugan. Gilauman nga kini nga impresibong kadaugan maoy magsilbing taytayan aron makaatbang na usab niya ang mga anaa sa top 5 sa flyweight division sa umaabot nga mga adlaw.