Nakadani og dakong atensyon sa social media ang usa ka Gujarati folk singer human mi-viral ang video nga nagpakita kaniya nga halos matabonan sa tinumpok nga kuwarta.
Nahitabo kini panahon sa usa ka Dayro, usa ka tradisyonal nga pasundayag sa Gujarat nga naghiusa sa musika, storytelling, ug humor, diin giulanan og kuwarta sa mga deboto sa Khambhaliya, Junagadh ang bhajan singer nga si Gopal Sadhu samtang nagkanta siya.
Makita sa viral nga video nga padayon siyang nagtukar og harmonium bisan pa nga nagtapok na ang daghang sako sa kuwarta sa iyang palibot ug hapit na siya matabonan niini.
Mikaylap dayon ang maong video sa social media ug naghatag og lain-laing reaksyon gikan sa pagdayeg hangtod sa diskusyon sa publiko.
Dili kini unang higayon nga nahitabo ang susamang eksena sa Gujarat, gumikan adunay uban pang bhajan performers sama ni Kirtidan Gadhvi nga nakaeksperyensya usab og pag-ulan sa kuwarta atol sa ilang performances.
Sumala sa tradisyon, kasagarang gigamit ang kuwarta nga madawat sa maong mga kalihokan alang sa charitable ug social causes.