Nakurat ang mga fans, followers, ug netizens human gibutyag sa aktres nga si Kaye Abad nga malampuson niining nabuntog ang pakigbisog batok sa breast cancer. Kini human wala naghatag og bisan unsang timaan kaniadto ang aktres bahin sa seryosong kondisyon nga gihambin sugod pa niadtong 2025.
Sa usa ka birthday vlog ni Kaye, nga gipagawas kagahapong adlawa,, gisaysay nini ang hapit usa ka tuig nga pagpatambal sa Singapore kauban ang bana nga si Paul Jake Castillo.
Nagsugod ang tanan sa dihang nagpa-check-up kini tungod sa sakit sa tiyan, diin nadiskobrehan ang iyang gallstones ug dungan niini ang upat ka sentimetro nga malignant tumor sa iyang dughan human sa mammogram.
Giangkon ni Kaye nga aduna silay kasaysayan sa breast cancer sa pamilya, ug temporaryo una nilang gisalig sa mga kabanay ang ilang duha ka anak samtang nagpaalim kini.
Taliwala sa grabe nga pagsulay, nahimo sa aktres nga dakong kasaligan ang lig-on nga pagtuo sa Diyos ug ang walay paghubas nga suporta sa iyang pamilya.
Malipayon ug mapasalamaton nga gianunsyo sa aktres nga sa pagkakaron, giisip na niini ang kaugalingon nga hingpit nang cancer-free.