Gitugyan na sa Department of Foreign Affairs (DFA) ngadto sa mga law enforcement authorities ang pagtubag sa mga impormasyon kon tinuod ba nga anaa sa nasod sa Sweden si kanhi Congressman Zaldy Co.
Sa usa ka pakighinabi, giingon ni DFA Secretary Ma. Theresa Lazaro nga ang maong isyu giisip nga usa ka law enforcement matter, busa mas maayo nga ang mga awtoridad ang pangutan-on kalabot niini. Gipasabot usab sa kalihim nga dili na kinahanglan nga makig-istorya pa siya sa Sweden tungod kay klaro na ang nakasuwat sa mga dokumento.
Ang gitumbok nga dokumento sa hepe sa DFA mao ang certiorari petition nga giduso ni Co batok kang Ombudsman Jesus Crispin Remulla. Nakalakip niini ang usa ka notaryo diin gihisgutan nga personal nga miatubang si Co niadtong Enero 15 sa usa ka notary public didto sa Stockholm, Sweden.
Kini sukwahi sa unang mga report nga posibleng anaa sa Portugal si Co tungod sa giingong paghupot niini og Portuguese passport nga posible na niyang nakuha kaniadto pa.