Gipasalig ni House Prosecutor ug Bicol Saro Party-list Rep. Terry Ridon nga andam na ang ilang kampo sa pagpresentar sa mga ebidensyang ilang gihuptan batok kang Bise Presidente Sara Duterte sa mosunod nga mga adlaw.
Kini human pormal nga giablihan ug gi-convene ang Senate Impeachment Court alang sa paglitis batok sa bise presidente.
Sumala ni Ridon nga motuman ang prosecution panel sa tanang mando, direktiba, ug legal nga proseso nga ipatuman sa impeachment court samtang nagpadayon ang makasaysayang trial sa Senado.
Samtang, nanawagan usab ang progresibong Makabayan Bloc nga sugdan dayon ugma ang paglitis batok kang VP Sara.
Gipasiugda nila ACT Teachers Rep. Antonio Tinio, Gabriela Women’s Party Rep. Sarah Jane Elago, ug Kabataan Rep. Renee Louise Co nga importante kini nga constitutional nga lakang alang sa accountability ug hustisya.
Naglaom usab ang grupo nga tumanon sa Senado ang ilang katungdanan uban ang seryosong dedikasyon ug paspas nga aksyon.
Matud pa sa Makabayan Bloc, dugay nang naghulat ang katawhang Pilipino sa mga tubag kabahin sa seryosong alegasyon sa korapsyon ug iregular nga paggamit sa pondo sa gobyerno.
Gipasalig usab sa mga progresibong magbabalaod nga magpadayon silang magmonitor aron maseguro nga patas, transparent, ug nakapokus sa tinuod nga isyu ang tibuok proseso sa impeachment trial.