Naangol ang usa ka drayber nga minor de edad human ang gimanehong motorsiklo nibangga sa luyo nga bahin sa usa ka trak nga puno sa tubo sa National Road, Purok-7, Dabong-dabong, Mailag, Valencia City, Bukidnon, kagahapong adlawa, Mayo 15, 2026, takna sa alas 10:45 sa gabii.
Sumala sa gipaabot nga taho, nagsubay sa inner lane gikan sa Barangay Colonia paingon sa sentro sa Valencia City ang maong motorsiklo samtang nagsunod sa usa ka wala mailhing Mitsubishi Montero.
Pag-abot sa dapit nga nahitaboan, giingong kalit nga mibalhin sa tuo nga bahin ang Montero aron mo-overtake sa nag-una niining trak nga kargado og tubo.
Tungod sa maong maneuver, kalit nga nabantayan sa minor de edad ang nag-unang trak hinungdan nga dinalian kini nga miambak sa iyang motorsiklo sa wala pa kini mibangga sa maong dako nga sakyanan.
Nakaangkon og mga samad ug bali sa lawas ang biktima nga dinalian usab nga gidala sa rescue team ngadto sa Laviña General Hospital alang sa medikal nga atensyon, samtang nakasinati usab og grabeng damyos ang motorsiklo.
Human sa insidente, nagpadayon sa pagdagan ug daling mipalayo sa maong lugar ang wala mailhing trak nga loaded og tubo.