Nasikop sa mga operatiba ang usa ka giilang Regional Priority Target ug iladong tigpayuhot og illegal nga druga human kini masikop sa gikasang drug buy-bust operation pasado alas 5:30 kagahapon sa buntag, Mayo 16, sa Purok-3, Barangay Kawilihan, Don Carlos, Bukidnon. Giila sa kapulisan ang suspetsado nga si alyas “Jade,” 51-anyos, usa ka mag-uuma ug residente ra usab sa maong dapit.
Sumala sa otoridad daling nasikop si alyas “Jade” human kini mikagat sa paon sa poseur buyer ug mibaligya og usa ka sachet sa gintuhong shabu nga nagkantidad og usa ka libo ka pesos. Atol sa body search, narekober pa sa iyang posisyon ang laing 11 ka mga sachet sa gintuhong shabu nga dunay kinatibuk-ang gibug-aton nga 32.80 ka gramo ug nagkantidad og kapin P233,000, kauban ang usa ka cellphone ug buy-bust money. Bisan pa man og gipanghimakak sa suspetsado ang maong ebidensya, gipursige gihapon sa mga otoridad ang pagtarong kaniya sa balaod.
Ang maong dinakpan mag-atubang sa kasong paglapas sa Comprehensive Dangerous Drugs Act of 2002. Sa pagkakaron, ang nahisgutang suspetsado anaa na sa kustodiya sa Don Carlos Municipal Police Station alang sa hustong disposisyon.