Hugot nga nanawagan ang Malacanang sa mga kritiko ug mga “basher” sa kasamtangang administrasyon, lakip na si kanhi Spokesperson Harry Roque ug Bise Presidente Sara Duterte, nga hunongon na ang pamumulitika ug ang pagpandaut sa gobyerno.
Matud pa ni Palace Press Officer USec. Claire Castro, dili na angay ang mga negatibong saway nga nagtumong lamang sa pagguba sa imahe sa kagamhanan taliwala sa mga krisis nga giatubang karon sa nasud.
Gihangyo ni Usec. Castro ang nahisgutang mga personalidad nga makigtambayayong na lamang alang sa kaayohan sa matag Pilipino.
Samtang diretso usab ang tubag sa Presidential Communications Office (PCO) kalabot sa bag-ong pamahayag ni Senador Imee Marcos diin nangayo kini og pasaylo sa mitaliwan nga amahan nga si kanhi Presidente Ferdinand Marcos Sr. tungod sa giingong “wala niini pagbabantay” sa igsoon nga si Presidente Ferdinand “Bongbong” Marcos Jr.
Sa gipahigayon nga press briefing, direktang gitubag ni USec. Castro ang senador ug gikuwestiyon kung kinsa ba gayud sa managsuon ang angay “bantayan” ug nahimong “badlungon.