MARAMAG, BUKIDNON — Nadakpan sa kapulisan ang usa ka 29-anyos nga lalaki nga giilang si alyas “Bolantoy” human nagpusta og moabot sa ₱354,000 sa mga duwa sa sabong bisan walay igbabayad sa New Maramag Sports Complex sa Barangay North Poblacion, Maramag, Bukidnon niadtong Agosto 9, 2026.
Subay sa imbestigasyon sa Maramag Municipal Police Station, nagsugod sa pagpusta ang suspek sa offline betting machine gikan alas-10:00 sa buntag hangtod alas-3:00 sa hapon. Gipasalig sa suspek ang 26-anyos nga teller nga naa sulod sa iyang bag ang kwarta nga iyang ibayad samtang nagpadayon ang mga duwa.
Apan sa dihang gisita na ang suspek sa teller aron pabayron sa iyang pusta nga niabot na og ₱354,000, kalit kining misulay sa pag-ikyas. Paspas nga nakapangayo og tabang sa kapulisan ang teller hinungdan sa gilayon nga pagkasikop ni alyas “Bolantoy”.
Tanggong na karon ang suspek sa selda sa Maramag MPS ug giandam na ang pormal nga kasong Estafa batok kaniya.