Mikanaug na sa ubos sa 17 ang nahibiling armadong miyembro sa New People’s Army (NPA) sa area of responsibility sa 4th Infantry “Diamond” Division (4ID), samtang kapin sa 100 na ang nibalik sa sabakan sa panggamhanan karong tuiga.
Sumala kay 4ID tagapagsulti Lt. Col. Joe Patrick Martinez, napugos ang nahibiling tropa sa NPA sa pagtago sa mga utlanan sa Misamis Oriental ug Agusan del Sur tungod sa padayon nga operasyon sa militar. Gilauman usab nga mosunod sa Misamis Oriental ang lalawigan sa Bukidnon nga ideklarang Stable Internal Peace and Security (SIPS) tungod sa kalampusan sa maong mga operasyon.
Dugang pa ni Martinez, mas daghang armas ang ilang narekober gikan sa mga arms cache sa kabukiran kumpara sa gidaghanon sa mga misurender. Kasamtangan usab nga gikauban sa Army ang mga former rebels o “Friends Rescued” sa kampanya batok sa recruitment sa NPA, partikular sa mga tunghaan ug komunidad aron matabangan ang uban nga pilion ang malinawong pagbalik sa ilang pamilya.