Nagplano ang panggamhanan sa Pilipinas nga mokuha og P1.7 trillion nga utang sa sunod tuig aron mapondohan ang mga gasto sa gobyerno ug matabonan ang gilaumang kulang sa koleksyon o budget gap.
Sumala kay Department of Budget and Management (DBM) Acting Secretary Kim Robert De Leon, gibanabanang moabot sa P6.9 trillion ang magasto sa gobyerno gikan sa gisugyot nga P7.2 trillion national budget, samtang ang kita o revenue sa nasod gibanabana rang moabot sa P5.2 trillion. Tungod niini, ang P1.7 trillion nga puyang o deficit kinahanglang tapakan pinaagi sa pagpangutang.
Gipatin-aw sa DBM nga kadaghanan sa maong hulamong pundo kuhaon gikan sa mga domestic creditor o mga institusyon sulod mismo sa nasod. Taliwala sa padayong pagdugang sa kabuuang utang sa Pilipinas nga umabot na sa P19.07 trillion niadtong Hunyo, nagpabilin ang baroganan sa gobyerno nga kinahanglan kining maong pundo aron mapadayon ang mga proyekto sa imprastraktura ug mga serbisyo sosyal sa nasod.