Nagtuo ang Palasyo nga posibleng adunay panagbangi sa gahum o kontrol sa likod sa pagkabuwag sa kaniadto nga alyansa nila ni Pangulong Ferdinand Marcos Jr. ug sa pamilya Duterte.
Matud ni Palace Press Officer Claire Castro, posibleng adunay mga grupo nga gustong makaimpluwensya o makakontrol sa Presidente, lakip na ang mga kondisyon nga giingong gipangayo sa kampo Duterte isip kapalit sa ilang suporta kang Marcos atol sa 2022 presidential election.
Misalig usab si Marcos sa pamahayag sa iyang anak nga si House Majority Leader Sandro Marcos bahin sa maong isyu. Matud ni Castro, nagtuo ang Presidente nga dili mamakak ang iyang anak.
Wala hinuon ibutyag sa Palasyo ang ngalan sa tulo ka tawo nga giingong nalambigit sa maong panaghisgot.
Giklaro usab ni Castro nga ang pagtan-aw bahin sa “power struggle” iya sa Presidential Communications Office ug dili direktang pahayag sa Presidente.