Namatay ang usa ka 18-anyos nga batan-ong lalaki human kini nakuryentehan samtang naghayhay sa ilang balay sa Purok 4, Barangay Poblacion Sur, Don Carlos, Bukidnon.
Subay sa imbestigasyon sa Don Carlos Municipal Police Station, naghayhay og binas-an nga mga bisti ang biktima sa usa ka alambre nga gigamit isip hayhayan sa dihang kalit kini nga na-kuryentehan.
Sa gihimong pagsusi sa kapulisan ug sa lineman gikan sa First Bukidnon Electric Cooperative (FIBECO), nadiskobrehan nga adunay gisi o guba nga live electric wire nga misandig sa atup sa ilang balay diin nakakonektar usab ang maong alambreng hayhayan.
Dali pang gidala ang biktima sa Pahilan Doctors Hospital alang sa medikal nga pagtambal apan gideklara na kining dead on arrival sa nag-atiman nga doktor.