Nakasinati og temporaryong pagkabungol ang usa ka 18-anyos nga lalaki sa China human maapektuhan ang iyang pandungog tungod sa kusog nga huni sa gatusan ka cicada o kuliglig.
Ang batan-on nga giila lamang sa apelyidong Wang, nakasinati og pag-ugong ug pagbati nga barado ang iyang mga dunggan human ma-expose sa kasaba sulod sa kapin upat ka oras.
Dihang mihilom na ang mga cicada, dili na niya madungog ang huni sa mga langgam ug notification sa iyang cellphone, hinungdan nga midiretso kini sa ospital.
Matud sa doktor, mahimong makaapekto sa pandungog ang sobra ug dugay nga exposure sa kusog nga kasaba. Maayo na usab ang iyang pandungog human sa duha ka semana nga pagpanambal ug pagpahulay sa dunggan.
Gipasidan-an usab nga ang grabeng kadaot sa gagmayng cells sa sulod sa dunggan mahimong mosangpot sa permanente nga pagkabungol.