Tulo ka seryosong kaso ang giatubang karon sa usa ka 45-anyos nga lalaki human kini nasikop sa kapulisan tungod sa pagdaladala og kargadong .45 nga pusil ug kutsilyo samtang nahubog sa Purok 6B, Barangay Aglayan, Malaybalay City niadtongmilabayng adlaw.
Subay sa impormasyon sa Malaybalay City Police Station, nagpahigayon og operasyon ang mga pulis human nakadawat og sumbong gikan sa usa ka residente bahin sa armadong suspek. Pag-abot sa mga awtoridad sa dapit, nakita ang suspek nga nahubog ug dali rang misulay sa pagpalamano o pag-suksuk sa pusil sa iyang hawak.
Dihang gipangitaan og lisensya ug legal nga dokumento sa armas, wala kiniy napakita ug nisukol pa pinaagi sa pagpakiglayog sa mga pulis dihang sakmiton na unta ang pusil. Apan dali ra kining napugngan ug napusasan sa mga responding personnel. Narekober gikan sa suspek ang usa ka caliber .45 Springfield Armory pistol nga adunay pito ka buok bala sa magazine, ug usa ka kutsilyo nga nailang “lugud” sulod sa iyang sling bag. Kasong paglapas sa illegal possession of firearms, illegal possession of bladed weapon, ug resisting arrest ang giandam karon nga ipasaka batok sa suspek.