2 ka giilang bag-ong tigpayuhot sa iligal nga droga ang nasikop sa gipahigayon nga magkalagbing buy-bust operation sa kapulisan sa Barangay Lumbo ug Barangay Poblacion, Valencia City niadtong Agosto 8, 2026.
Unang nasikop sa Purok 7, Sinalayan, Barangay Lumbo ang suspek nga si alyas “Abel,” 41 anyos, diin nakumpiska gikan kaniya ang lima ka sachet sa gitoohang shabu nga nagtimbang og 5.4 gramo ug nagkantidad og ₱36,720.
Paglabay sa pipila ka minuto, nasakmitan usab sa Purok 2, Barangay Poblacion si alyas “Kentoy,” 21 anyos, og lima usab ka sachet sa shabu nga adunay kabug-aton nga 6.3 gramo ug nagkantidad og ₱42,840.
Sa katibuk-an, moabot sa 11.7 gramo sa shabu nga nagkantidad og ₱79,560 ang nasakmit sa Valencia City Police Station ug Bukidnon PPO. Nag-atubang na karon ang duha ka suspek og kasong paglapas sa Republic Act 9165 o Comprehensive Dangerous Drugs Act of 2002.