Gibatikos ni US President Donald Trump ang nasod sa Germany human kini mibalibad sa paghatag og suportang militar sa nagpadayong kagubot tali sa Amerika ug Iran sa Middle East.
Kini human nagpagawas og pamahayag ang mga opisyal sa Germany, lakip na si Defense Minister Boris Pistorius, nga nag-ingon: “This is not our war” (Dili kini among gubat), ug giklaro nga wala sila’y labot sa pagsugod niini.
Isip tubag, gihulagway ni Trump nga “dakong sayop” ang maong baroganan. Matod niya, dako ang natabang sa Amerika sa seguridad sa Europa ug sa NATO, apan karon nga ang Amerika nagkinahanglan og tabang aron maablihan ang Strait of Hormuz, mibalibad ang maong mga alyado.
Gikumpara usab ni Trump ang sitwasyon sa gubat sa Ukraine, diin matod niya, bisan og “dili usab kadto gubat sa Amerika,” mihatag gihapon sila og bilyon-bilyong dolyar nga tabang, apan wala kini suklia sa Germany niining higayuna.