Usa ka talagsaong kalampusan ang nakuha sa usa ka 33-anyos nga engineer nga si Prathab Muniandy human niya opisyal nga nakab-ot ang titulong “pinakadaghan og ngipon sa tawo (lalaki)” sa tibuok kalibutan gikan sa Guinness World Records.
Sa gihimo nga pagsusi ug pag-ihap sa iyang mga ngipon didto sa nasod sa India, nakurat ang mga eksperto ug mga dentista sa dihang nasayran nga miabot ngadto sa 41 ka piraso ang kinatibuk-ang gidaghanon sa ngipon ni Muniandy sa sulod sa iyang baba. Layo ra kaayo kini sa normal nga gidaghanon sa ngipon sa usa ka hamtong o adult nga tawo nga kasagaran anaa lamang sa 32 ka piraso.
Matud pa ni Muniandy, wala siya makasinati og bisan unsang sakit o problema sa iyang pagkaon ug pagsulti luyo sa maong kondisyon, ug dako ang iyang pasalamat nga ang iyang talagsaong pisikal nga hiyas nahimo pang dalan aron mailhan ang iyang ngalan sa tibuok kalibutan.