Kapin sa P7.3 bilyon nga cash aid ang napang-apod-apod na sa Department of Social Welfare and Development (DSWD) ngadto sa kapin 1.4 ka milyong drayber sa public utility vehicle (PUV) sa tibuok nasud.
Sumala kang Asst. Secretary ug DSWD spokesperson Irene Dumlao, padayon ang paghatag og tabang sa tanang rehistrado ug lehitimong drayber nga naa sa validated nga listahan gikan sa Transport Network Companies (TNCs).
Dugang pa sa opisyal, nagpadayon gihapon ang payout para sa mga drayber sa jeepney ug tricycle sa gawas sa National Capital Region (NCR).
Samtang ang mga PUV driver sa NCR adunay gitakdang iskedyul alang sa special payout, lakip na ang mga drayber sa Transport Network Vehicle Service, motorcycle taxi, ug mga service delivery rider.
Kini nga programa kabahin sa Unified Package for Livelihoods, Industry, Food, and Transport framework, nga nagtumong sa pagtabang sa sektor sa transportasyon nga apektado ang panginabuhian.