Nakuha sa San Antonio Spurs ang unang puntos sa best-of-seven Western Conference Finals human nila gipildi ang Oklahoma City Thunder sa iskor nga 122-115 pinaagi sa usa ka kulbahinam nga double overtime (2 OT).
Mibida sa kadaugan sa Spurs ang ilang bitoon nga si Victor Wembanyama nga nagmando sa sawog human mitala og dako nga 41 puntos ug 24 ka rebounds. Katabang usab niya ang rookie nga si Dylan Harper nga mipuno og 24 puntos ug team-playoff record nga pito ka steals human gipuli sa na-injured nga si De’Aaron Fox.
Matud ni Spurs coach Mitch Johnson, nahimong dakong inspirasyon ug motibo alang kang Wembanyama ang wala niini pagdaog isip Most Valuable Player (MVP) karong tuiga, diin ang maong pasidungog nakuha sa pambato sa OKC nga si Shai Gilgeous-Alexander. Kini ang unang kapildihan sa Thunder sa kasamtangang playoffs.