Top 8 Most Wanted Person sa lalawigan sa Bukidnon, nasikop sa operasyon sa lungsod sa Quezon, Bukidnon

Nasikop sa mga operatiba sa Quezon Municipal Police Station ang giila nga Top 8 Most Wanted Person sa provincial level tungod sa kasong pilferage kon kawat sa kuryente o kagamitan niini.

Gikumpirma sa kapulisan nga ang nadakpan nailang si Darwen Taglin Ansul-og, 30-anyos, kinsa nasikop pinaagi sa warrant of arrest didto sa Barangay Libertad sa maong lungsod. Nag-atubang ang suspek sa duha ka ihap sa paglapas sa Republic Act 7832 o Anti-Pilferage Act, diin gipahamtangan kini sa korte og piyansa nga mobalor sa usa ka gatos ka libo (100,000) ka pesos matag kaso alang sa iyang temporaryong kagawasan.

Sa pagkakaron, ang suspek nagtingkagol na sa pasilidad sa Quezon MPS alang sa saktong dokumentasyon ug disposisyon sa kaso.