Miabot na sa nasod sa China si Russian President Vladimir Putin alang sa iyang opisyal nga duha ka adlaw nga pagbisita (Mayo 19-20) aron makigtagbo kang Chinese President Xi Jinping.
Tumong sa maong pagbisita ni Putin nga mas mapalalim ug mapalapad pa ang “strategic partnership” ug kooperasyon sa ekonomiya tali sa Russia ug China. Natunong usab ang iyang pag-abot sa ika-25 nga anibersaryo sa Sino-Russian Treaty of Friendship nga gipirmahan niadtong tuig 2001, ug sa pagsugod sa Russia-China Years of Education. Sa usa ka mensahe sa wala pa siya miabot, gihulagway ni Putin nga ang relasyon sa duha ka nasod anaa karon sa “pinakataas nga lebel” (unprecedented level).
Gawas niini, ang pagbisita ni Putin dako nga giatok sa tibuok kalibutan tungod kay nahitabo kini pipila lang ka adlaw human usab mibiya sa China si US President Donald Trump nga mibisita sab didto. Gilauman nga hisgutan sa duha ka lider ang mga isyu sa patigayon, enerhiya, ug uban pang dagkong internasyonal nga krisis sa kalibutan.