Gipasabot karon sa lokal nga kagamhanan sa Quezon, Bukidnon ang kahimtangan sa Bukidnon–Davao detour road sa Sitio Kipolot, Barangay Palacapao nga subli kining gisirad-an human sa Christmas.
Sa eksklusibong pakighinabi kang Forts Cabarde, Public Information Officer sa LGU–Quezon, gipasabot nga temporaryong giablihan ang dalan sa kaadlawon sa gikan sa ulahing semana sa Disyembre 2025 hangtod Enero 3, apan subling gisirad-an gumikan nagbalin na ang operasyon alang sa pagtrabaho sa maong dalan human sa Christmas break sa mga trabahante.
Sumala niini, gilauman nga maablihan na ang maong dalan sa dili pa molapas ang Enero 15, aron mabalik normal na ang pagbiyahe sa mga sakyanan ug sa pagpagawas ug pagsulod sa mga produkto sa Bukidnon, hilabi na aduna kini dakog papel sa ekonomiya sa lalawigan ug sa rehiyon.
Matud pa ni Cabarde, gidali usab ang pagtrabaho tungod gilauman ang subling pagbisita ni Department of Public Works and Highways Secretary Vince Dizon.
Giklaro usab nga ang Bukidnon–Davao detour road anaa pa sa Phase 1 sa pagpatuman sa proyekto diin ang dalan giplanong sementohon pinaagi sa by-phase nga pamaagi, ug gilaoman nga masugdan ang aktuwal nga pagsimento niini karong tuiga.
Sumala ni Cabarde, sa kasamtangang gitutoka usa ang pagbukas sa detour road aron adunay maagian sa mga sakyanan.
Dugang pa niini, nga gipadalhan na kini og mga eksperto aron masusi ug ma-assess ang kahimtangan sa yuta sa maong dalan nga magsilbing basihan sa sunod nga mga lakang sa konstruksyon.
Miluwat usab si Cabarde, nga itugyan na lamang sa Department of Public Works and Highways kauban mga kontraktor ang maong proyekto, aron masiguro nga masunod ang hustong teknikal nga mga sumbanan ug mapaayo ang kahimtangan sa dalan alang sa kaluwasan ug kahapsay sa pagbyahe sa mga motorista.
Samtang, padayon usab ang 24 oras nga operasyon sa RTMI ug nabalik na ang dawat-dawat nga sistema sa mga pasahero.
Dugang pa niini, nga aduna usab alternatibong rota gikan sa Puntian paingon sa White Kulaman nga mogawas sa Katipunan sa Arakan, samtang nagpadayon ang pag-ayo sa maong dalan.