Midagsa ang daghang katawhan sa Snack Kingdom sa Furong Square sa Changsha, China, nga giingong pinakadakong snack store sa kalibotan, tungod sa kapin 12,000 ka square meters nga kadako niini ug sa sobra 35,000 ka klase sa snacks nga gikan sa 70 ka naglain-laing nasud.
Gihimo kini sa Mingming Henmang, ang pinakadakong snack retail chain sa China nga adunay kapin 6,500 ka snack brands gikan sa tibuok kalibutan.
Nakadawat dayon kini og Guinness World Record isip “World’s Largest Snack Store” sa mismong adlaw sa pag-abli niadtong Abril 17.
Sa pagsulod sa tindahan, makita ang taas nga “snack corridor” nga puno sa kolorido nga snacks nga naka-display sa glass cabinets, nga nakadani sa daghang bisita ug turista.
Usa sa pinaka-pasigarbo niini mao ang “Instant Noodle City” nga adunay kapin 3,500 ka klase sa instant noodles gikan sa lain-laing nasud.
Aduna usab kini cola section nga nagpakita og mga soda gikan sa mga 20 ka nasud, apil ang mga talagsaon nga flavor sama sa salted cola.
Tungod sa kadaghan sa mga tawo nga mibisita, napugos ang management nga temporaryong mohunong sa baligya duha ka adlaw human sa grand opening aron ayohon ang restocking, checkout system, ug uban pang operasyon.
Bisan pa niini, gitugotan gihapon ang mga bisita nga mosuroy ug magkuha og litrato sulod sa tindahan.
Makalingaw usab nga ang Changsha adunay laing dako nga snack store nga nagbaligya og higanteng bersyon sa mga sikat nga snacks sama sa usa ka brand sa chips, biscuits ug instant noodles.