Miabot na sa 25 ka job fair ang gipahigayon sa Department of Labor and Employment (DOLE) sa lalawigan sa Bukidnon karong tuiga, diin natala ang kapin 40,000 ka bakanteng trabaho alang sa mga aplikante.
Apan sa pakighinabi sa Bombo Radyo, giila ni DOLE-Bukidnon Provincial Director Charlton James R. Busa nga pabilin nga hagit ang skills mismatch o ang kakuwang sa kaalam ug kwalipikasyon nga gipangita sa mga employer gikan sa mga aplikante. Tungod niini, nakigtambayayong ang DOLE uban sa TESDA pinaagi sa mga programang JobStart ug Government Internship Program (GIP) aron mapaasaka ang katakos ug higayon sa mga benepisyaryo nga makasulod sa trabaho.
Sa kasamtangan, kapin 450 ka aplikante na ang dihadiha nga nadawat o hired on the spot. Dihagipahigayon usab ang panawagan sa mga nagpangita og trabaho nga mosalmot sa mga umaabot nga job fair sa Lungsod sa Impasug-ong karong adlawa, Setyembre 30, sa Lungsod sa Baungon karong Oktubre 12, ug sa Dakbayan sa Malaybalay karong Nobyembre 20.