Lalaki, patay human pusila sa ulo samtang nagtambong sa haya sa Baungon

Patay ang 34-anyos nga lalaki human pusila sa ulo samtang nagtambong sa haya sa Purok 6, Barangay Lingating, Baungon, Bukidnon pasado alas-6 sa buntag kagahapon.

Sumala sa kapulisan, nag-inom ang biktima ug 31-anyos nga suspek sa maong haya sa dihang naglalis ug nagkasumbagay ang duha.

Human mapildi sa away, mibiya ang suspek apan mibalik makalabay sa pipila ka minuto nga armado ug gipusil ang biktima sa ulo.

Gidala pa sa pamilya ang biktima sa Talakag Provincial Hospital apan gideklarar kining dead on arrival alas-7:31 sa buntag.

Nagpadayon ang hot pursuit ug manhunt operation batok sa suspek nga nakasibat sa wala matino nga direksyon.