Dili ubos sa 33 ka tawo ang nangamatay samtang 36 ang naangol human nagpahigayon og pag-atake sa kawanangan (airstrike) ang militar sa Myanmar duol sa usa ka merkado sa lungsod sa Kyauktaw, Rakhine State.
Subay sa gipagawas nga pahayag sa kapundokan sa rebeldeng Arakan Army nga gipamatud-an usab sa rescue official nga si Wai Hun Aung, duha ka bomba ang gihulog gikan sa usa ka fighter jet sa taliwala sa adlaw duol sa maong wholesale center. Lakip sa mga namatay ug naangol mao ang mga tindero, kustomer, ug mga molupyo sa maong dapit.
Gipasidaan sa Arakan Army nga posibleng mosaka pa ang ihap sa mga namatay samtang nagpadayon ang retrieval ug rescue operations diha sa nalumpag nga pamilihan. Sa kasamtangan, wala pa’y gipagawas nga opisyal nga pahayag ang junta militar sa Myanmar bahin sa insidente, taliwala sa nagpadayon nga kaguluhan sa nasud sukad sa gipahigayong military coup kaniadtong tuig 2021.