Gitumbok sa kapulisan ang usa ka Person of Interest (POI) sa kaso sa pagpamusil nga ikamatay sa 56-anyos nga lalaki sa Sitio Codcod, Barangay Dagumbaan, Maramag niadtong milabayng adlaw.
Sumala sa imbestigasyon, ang biktima nga residente sa maong barangay napalgan nga wala nay kinabuhi daplin sa dalan nga adunay mga samad pinusilan sa lawas. Nasayran nga samtang nagmaneho kini sa iyang pula nga motorsiklo pauli sa ilang balay, kalit kining gipusil sa wala mailhing suspetsado nga dayong miikyas paingon sa wala mahibal-an nga direksyon.
Sa pakighinabi sa Bombo Radyo Malaybalay kay PCOL Alexander Eugenio  sa Maramag Municipal Police Station. , gibutyag niini nga ang biktima giila kunong badlungon sa ilang lugar ug adunay mga kasong giatubang. Gituohan usab nga giatangan ang biktima tungod kay hilit ang dapit nga nahitaboan sa insidente.
Samtang nagpadayon ang imbestigasyon, gisusi pa sa kapulisan ang identidad sa gitumbok nga Person of Interest nga giingong adunay personal nga panagbangi sa biktima sa wala pa ang insidente, ug gilauman nga ipagawas ang ngalan niini human sa beripikasyon aron matabangan sa pagsulbad sa kaso.