Gilauman sa lokal nga panggamhanan sa Valencia City nga masugdan na sa sunod tuig ang dungan nga pagtukod sa bag-ong ospital ug City Hall.
Kini human gibutyag ni Jun Galario Jr., ang consultant ug tigpamaba sa kagamhanang lokal, sa pakighinabi sa Bombo Radyo Malaybalay, nga giproseso na karon sa Land Bank of the Philippines ang gikinahanglang loan alang sa maong mga dambuhalang proyekto, diin gilaumang maaprubahan kini karong Hulyo o Agosto ning tuiga.
Matud ni Galario, kung hingpit nang makabalhin ang mga opisina sa gobyerno ngadto sa bag-ong City Hall, plano sa siyudad nga paabangan ang kasamtangang building ngadto sa mga pribadong kompanya o kaha gamiton kini alang sa sektor sa edukasyon aron makahatag og dugang kita sa maong dakbayan.
Dungan niini, gipasalig sa pamunoan nga magpadayon ang matag adlaw nga paghatag og medikal nga ayuda ug libreng tambal ngadto sa mga residente, dungan sa pagsulod sa mga bag-ong pamuhunan nga gilaumang makamugna og dugang trabaho ug mopalambo pa sa lokal nga ekonomiya.