Giduso na sa lokal nga panggamhanan ang proseso aron opisyal nga madeklarang Highly Urbanized City (HUC) ang Valencia City, Bukidnon—lakang nga gilaumang magdala og mas dakong pondo ug mas halapad nga serbisyo publiko.
Sa interview sa Bombo Radyo Malaybalay, gikompirma ni Jun M. Galario Jr., ang consultant ug tigpamaba sa siyudad, nga nakapasar na ang Valencia sa mga criteria sa HUC, partikular sa lokal nga kita (income) ug populasyon. Matud niya, gisugdan na ang legal nga proseso pinaagi sa resolusyon sa Sangguniang Panlungsod padulong sa rebyu sa nasudnong kagamhanan ug pagpirma sa Malacañang.
Kung maaprobahan, dako ang isaka sa National Tax Allocation (NTA) sa siyudad nga magamit sa pagpalapad sa mga programa sa ayuda, sama sa educational assistance alang sa mga estudyante ug suporta sa mga motorela driver.
Sa pikas bahin, gipahibalo usab ni Galario ang hugot nga kampanya batok sa ilegal nga droga sa siyudad. Gani, pipila ka mga empleyado sa city hall ang natangtang na sa serbisyo human nag-positibo sa gihimong surprise drug testing, samtang ang uban gipaubos na sa rehabilitasyon.
Gilauman sa mga lokal nga opisyal nga pinaagi sa HUC status, mas paspas ang kalamboan ug mas episyente ang paghatag og serbisyo ngadto sa mga residente sa Valencia.