Hugot nga gipatuman sa Philippine Drug Enforcement Agency (PDEA) Region X ang kampanya batok sa gidiling druga.
Mukabat sa kapin tunga sa milyon ka pesos nga kantidad sa illegal nga druga ang nakumpiska sukad niadtong Enero.
Sumala ni Dir. Alex M. Tablate, Regional Director sa PDEA-X, sa pakighinabi sa Bombo Radyo Malaybalay gibutyag niini nga adunay gibana-banaang 14 ka anti-drug operations ang ilang napahigayon.
Kini miresulta sa pagkasikop sa 34 ka mga suspetsado nga nalambigit sa pagpamaligya ug paggamit sa gidiling druga.
Gibutyag ni usab sa direktor nga nagpabiling aktibo ang kampanya batok sa illegal nga druga sa tibuok Northern Mindanao.
Dugang pa niin, ang padayon nga pagpahigayon og adlaw-adlaw nga anti-drug operations sa ilang mga operatiba nagpamatuod lamang nga wala pa nasumpo ang kalihukan sa iligal nga droga ug nagkaylap pa ang naga-supply niini sa mga komunidad.
Gipaniguro sa direktor nga dili sila mohunong sa pag-aksyon sa tanang mga report nga madawat sa ilang buhatan.
Tungod niini, gilauman ang mas gipakusgan pa nga mga operasyon sa tibuok rehiyon aron hingpit nga maputol ang sirkulasyon sa illegal nga droga.