Nangandam ang duha ka abogado alang sa impeachment complaint batok kang Commission on Elections (Comelec) Chairman George Erwin Garcia ug sa unom pa ka komisyonado tungod sa giingong “institutional misconduct” sa eleksyon niadtong tuig 2022 ug 2025.
Ang reklamo gisumite nila Eldrige Marvin Aceron ug Sikini Labastilla sa House of Representatives, nga naglatid og upat ka basihanan para sa impeachment.
Lakip sa mga akusasyon ang paglapas sa Automated Election System Law tungod sa paggamit og software nga giingong wala moagi sa mandatory source code review; paglapas sa pagsalig sa publiko pinaagi sa paggamit sa usa ka “unauthorized intermediary server” nga nakaresulta sa pagka-delay sa transparency servers; ug paglikay sa paghatag og impormasyon bahin sa paggamit sa private IP address sa kapin sa 20,000 vote-counting machine modems niadtong 2022.
Gihisgutan usab sa reklamo ang giingong selective enforcement sa campaign finance laws, nga pabor sa pipila ka senador nga kaalyado sa administrasyon, lakip na sila Sen. Francis “Chiz” Escudero ug Sen. Rodante Marcoleta.
Sumala sa mga nagreklamo, importante nga ipasaka ang kaso karon gumikan hapit na matapos ang termino sa duha ka komisyonado, samtang si Garcia nakatakda nga mangulo sa 2028 elections.
Gipanghimakak ni Garcia ang mga akusasyon ug giingon nga balik-balik na niya kini nga gitubag.
Dugang pa niini, nga napamatud-an ang kredibilidad sa tuig 2022 ug 2025 elections pinaagi sa random manual audits, ballot revisions, ug pag-ila sa international community.
Ang impeachment complaint gilauman nga magsugod og masusi nga proseso sa Kamara, nga posibleng magbukas og mas lawom nga diskusyon bahin sa integridad sa eleksyon sa nasud.