Giila sa Senate plenary kagapong adlawa, ang makasaysayanong kadaugan sa Filipino e-sports team nga Aurora Gaming PH sa bag-o lang nahuman nga Mobile Legends: Bang Bang (MLBB) M7 World Championship sa Jakarta, Indonesia.
Gisagop sa Senado ang Resolution No. 34 isip pagtimbaya ug opisyal nga pag-ila sa garbo nga gihatag sa maong mga atleta sa nasud. Ubos sa pagpanguna nina Edward, Demonkite, Yue, Domeng, ug Light, gipakita sa Aurora Gaming PH ang ilang kahanas human nila gipildi ang Indonesian team nga Alter Ego sa iskor nga 4-0 sa grand finals niadtong Enero 25.
Matud pa sa Senado, ang maong kalamposan usa ka ebidensya sa kahanas ug disiplina sa mga Pinoy sa kalibutan sa e-sports. Tungod sa maong kadaugan, napanalipdan sa Pilipinas ang ilang dominasyon sa MLBB world stage sulod sa unom ka sunod-sunod nga tuig.
Ang Aurora Gaming PH mipauli usab dala ang grand prize nga $320,000 (gibana-bana nga ₱18 million) gikan sa maong kompetisyon.