Gilusad na sa banay sa kapulisa ang usa ka manhunt operation sa batok sa wala pa mailhing suspek nga nipusil-patay sa usa ka negosyante og isda sa Purok 15, Barangay Bagontaas, Valencia City, kagahapong adlawa. Giila ang biktima nga usa ka 53-anyos nga lalaki, residente sa Barangay Lumbo.
Subay sa report, paingon matud pa ang biktima sa fish landing area sakay sa iyang motorsiklo nga adunay sidecar sa dihang kalit kining giatangan ug gipusil sa suspek.
Sa pakighinabi sa Bombo Radyo Malaybalay kang PLTCOL. Bryan M. Panganiban, Chief of Police sa Valencia City Police Station, gibutyag niini nga ginasubay na nila ang mga CCTV footages gikan sa point of origin hangtod sa dapit diin nahitabo ang krimen ug ang posibleng agianan sa suspek.
Dugang pa sa opisyal, nakaangkon og samad pinusilan sa wala nga bahin sa ulo ang biktima gamit ang kalibre 45 nga pistola nga miresulta sa hinanaling kamatayon niini.
Giklaro usab niini nga ang nahitabong insidente usa lamang ka “isolated case” ug wala kini nagpakita sa kinatibuk-ang kahimtang sa seguridad sa dakbayan.
Gipasalig sa opisyal sa publiko nga himuon sa kapolisan ang tanan nilang makaya aron masulbad ang maong kaso sa labing daling panahon.
Sumala ni Panganiban, nagpabiling malinawon ang Valencia City sa kinatibuk-an luyo sa maong panghitabo. Kahinumduman nga human sa krimen, daling miikyas palayo ang suspetsado sakay sa usa ka motorsiklo paingon sa habagatang direksyon.
Apan subay niini, gipahibalo ni PLTCOL. Panganiban, nga mas gipahugtan pa karon sa kapulisan ang pagpatuman sa seguridad sa dakbayan. Ubos sa ilang gipakusgan nga kampanya, gihingusgan ang implementasyon sa “No Plate, No Travel” policy ug ang pag-monitor sa mga “riding-in-tandem”.