Mahimong maablihan ang mga bank records bisan pa man sa proteksyon sa Bank Secrecy Law kon kini adunay kalabutan sa usa ka impeachment proceeding.
Sa pakighinabi sa Bombo Radyo Malaybalay kang Atty. Eddie Cuaresma, kanhi presidente sa Integrated Bar of the Philippines (IBP), gipasabot niini nga bisan og “general rule” ang pagka-kompidensyal sa bank deposits, adunay mga “exceptions” ang balaod ilabina sa mga kaso sa impeachment ug court proceedings.
Gihisgutan usab ni Cuaresma ang legal nga lantugi kon mahimo bang maapil ang bank records sa bana o asawa sa usa ka opisyal nga giimbestigahan. Sumala kaniya, mas adunay basehan nga maablihan kini tungod sa prinsipyo sa conjugal property ug ang kamatuoran nga ang impeachment usa ka “constitutional process” alang sa accountability sa mga opisyal sa gobyerno.
Hinuon, gipasiugda sa maong legal expert nga ang pinal nga desisyon magdepende gihapon sa korte o sa Korte Suprema. Matud niya, importante ang checks and balance sa gobyerno aron maseguro nga malikayan ang bisan unsang abuso sa gahum sa atong demokratikong sistema.