Kasamtangang nagpaalim sa balay tambalanan ang usa ka 27-anyos nga lalaki human gitigbas sa iyang kauban sa inom sa Purok 4, Barangay Bizmarts, Don Carlos, niadtong gabii sa Abril 26, 2026.
Matod pa sa kapulisan, nahitabo ang insidente alas 9:45 sa gabii samtang nag-inom ang biktima ug ang 41-anyos nga suspetsado. Nasayran nga mibuto ang usa ka mainitong lalis tali sa duha tungod sa giingong pangabugho o selos, nga misangpot sa pagpangatake sa suspek gamit ang usa ka sundang.
Naigo ang biktima sa iyang tuo nga bukton ug daling gidala sa ospital diin kini anaa na sa stable nga kahimtang.
Paspas usab nga milihok ang mga personahe sa Don Carlos Municipal Police Station pinaagi sa usa ka hot pursuit operation nga miresulta sa pagkasikop sa suspetsado. Narekober usab sa dapit nga nahitabuan ang sundang nga gigamit sa krimen. Sa pagkakaron, giandam na sa kapulisan ang mga dokumento alang sa pagsang-at og tukmang kaso batok sa suspetsado.