Napakyas ang Los Angeles Lakers sa pagtapos dayon sa serye human sila gipildi sa Houston Rockets sa Game 4 sa NBA Playoffs, 115-96. Tungod niini, naputol ang tulo ka sunod-sunod nga daug sa Lakers ug napugngan ang tinguha nila nga ma-sweep ang Rockets.
Nanguna alang sa Rockets si Amen Thompson nga mipupo og 23 puntos, pito ka assists, ug upat ka rebounds. Nakadawat sab siya og dakong suporta gikan sa iyang mga kauban aron mapabilin nga buhi ang ilang paglaum sa serye.
Sa bahin sa Lakers, si Deandre Ayton ang nangulo sa koponan nga adunay 19 puntos, apan wala kini paigo aron buntogon ang Rockets sa ilang balwarte. Bisan pa man sa maong kapildihan, nagpabilin gihapon nga nag-una ang Lakers sa serye, 3-1.
Gipaabot nga mobalik ang aksyon sa Game 5 didto na sa Crypto.com Arena sa Los Angeles, diin adunay tsansa na usab ang Lakers nga tuldukan ang serye ug moabante sa sunod nga hugna.