Nakamugna og kasaysayan sa natad sa “bioart” ang performance artist nga si Stelarc human kini nahimong unang tawo nga malampusong nakabutang og ikatulong dalunggan diha mismo sa bukton niini.
Ang maong nga proyekto gitawag og “Ear On Arm,” nagkinahanglan og kapin usa ka dekada nga pagpangandam ug tabang gikan sa tulo ka plastic surgeons aron hingpit nga matuman.
Ang proseso naglakip sa pagpasulod og saline solution ug silicon implant sa iyang braso, sa wala pa kini gi-ukit aron makuha ang tinuod nga porma sa dalunggan sa tawo gamit ang iyang kaugalingong panit.
Matud pa, dili lamang kini basta dekorasyon o arte, ang maong dalunggan literal nga makadungog pinaagi sa usa ka gamay nga mikropono nga gibutang sa sulod niini.
Bisan tuod og temporaryo kining gitangtang tungod sa impeksiyon, dako ang plano ni Stelarc nga ibalik kini ug ikonektar sa internet.
Kung mahitabo man kini, ang iyang braso magsilbi nang remote listening device diin ang bisan kinsa gikan sa bisan asang dapit sa kalibotan mamahimong makapaminaw sa live nga nadungog sa dalunggan sa iyang braso.
Dugang pa niini, gitinguha usab ni Stelarc nga himoong usa ka Bluetooth system ang iyang dalunggan, diin ang receiver ug speaker ibutang sa sulod mismo sa iyang baba.
Sumala sa artist, kung aduna’y motawag sa iyang cellphone, makig-estorya kini gamit ang dalunggan sa braso ug madungog ang tingog sa kaestorya sa sulod mismo sa iyang ulo.
Talagsaon usab ang epekto niini sa publiko tungod kay kung iyang ibuka ang iyang baba, madungog sa mga tawo sa iyang palibot ang tingog sa iyang kaestorya nga daw gikan sa sulod mismo sa iyang lawas.