DA, nagpahimangno sa sayop nga impormasyon mahitungod sa swine repopulation project

Nagpagawas og pasidaan ang Department of Agriculture (DA) batok sa nagkaylap nga sayop nga impormasyon kalabot sa Swine Repopulation Project (SRP).

Sumala sa DA, ang SRP usa ka tulo ka tuig nga programa nga nagtumong sa pagpabalik ug pagpalig-on sa populasyon sa baboy sa nasud human sa dakong kadaot nga gidala sa African Swine Fever (ASF).

Kabahin sa maong proyekto ang pagtukod sa maayo ug luwas nga breeding system sugod sa mga source farms hangtod sa mga multiplier ug production farms pinaagi sa siyentipiko ug bio-secure nga mga pamaagi.

Sumala sa katin-awan sa ahensya, gilauman nga makatabang ang SRP sa pagpahunong sa kakulang sa suplay ug sa pagpaubos ingon man sa pagpabalik sa kalig-on sa presyo sa karne sa lokal nga merkado.