Tingkagol na sa selda sa kapulisan ang usa ka 24-anyos nga lalaki human malampusong masikop sa gikasang buy-bust operation sa Purok 6, Barangay Liboran, Baungon, niadtong kaadlawon sa Abril 27, 2026.
Sa report gikan sa Baungon Municipal Police Station, nakuha gikan sa posisyon sa suspetsado ang duha ka sachet sa gituohang shabu nga nagkantidad og ₱6,800 ug motimbang og usa ka gramo. Lakip sa mga ebidensya nga nasakmit mao ang usa ka motorsiklo nga walay plaka ug ang gigamit nga marked money.
Gihimo ang imbentaryo sa mga ebidensya atubangan sa mga opisyal sa barangay ug representante gikan sa Department of Justice (DOJ) aron pagsiguro sa legalidad sa operasyon.
Sa pagkakaron, giandam na ang kasong paglapas sa Sections 5 ug 11 sa Republic Act 9165 o ang Comprehensive Dangerous Drugs Act of 2002 batok sa dinakpan.