ORLANDO, Florida – Usa na lang ka daog ang gikinahanglan sa Orlando Magic aron tuldukan ang serye human nila gipildi ang Detroit Pistons, 94-88, sa Game 4 sa NBA Playoffs. Tungod niini, gunit na sa Magic ang 3-1 nga labaw ug nameligro na nga mabiktima sa “upset” ang No. 1 seed nga Pistons.
Nipupo og 22 puntos si Desmond Bane, samtang nidugang og 19 puntos si Franz Wagner sa wala pa kini mugawas tungod sa gihambin nga calf soreness. Nakatampo sab og “double-double” si Wendell Carter Jr. nga adunay 12 puntos ug 11 rebounds aron masiguro ang kadaugan sa Magic sa ilang kaugalingong balwarte.
Sa bahin sa Pistons, naningkamot si Cade Cunningham nga mitala og 25 puntos, apan wala kini nakasaka tungod sa ilang 20 ka turnovers—doble itandi sa 12 lang sa Orlando.
Gikatakda ang Game 5 karong Miyerkules (Huwebes sa Pilipinas) didto sa Detroit, diin suwayan sa Magic nga hingpiton ang ilang pag-abante sa sunod nga hugna.