Samtang puliki sa mobile games ang kadaghanan sa iyang mga kaedad nga 14-anyos, usa ka estudyante sa China ang naggahin og panahon sa paghimo og makina sa turbojet!
Dili ordinaryo nga bata si Che Jingang, nagsugod ang iyang interes sa aeronautics niadtong nag-kindergarten pa lamang kini sa dihang nahimo nang curious kon ngano ug giunsa paglupad sa mga eroplano nga papel. Pag-abot og Grade 3, gitun-an niini mao na ang calculus, aerodynamics, ug circuitry.
Imbes nga kopyahon ang mga libreng blueprints nga nagkatap sa internet, buot niini nga idisenyo ang matag piyesa gikan sa sinugdanan.
Dinhi na mitumaw ang iyang ambisyon nga labwan ang pagpilo-pilo og papel ug hingpit nga maghimo og tinuod nga makinarya.
Ang proyekto ni Che dili lamang usa ka yano nga dulaan, kondili usa ka tinuod nga miniature jet engine. Bisan og gipagamay kini ug dili kayang makapalupad og komersyal nga eroplano, usa kini ka tinuod nga makina nga kompleto sa combustion chamber, compressor, ug fuel system.
Ang mismong operasyon niini nakabase sa tinuod nga physics ug aerodynamics, hinungdan nga naglihok kini nga kaparehas gayod sa mga life-size nga jet.